Kitab Inda Kuasa

Syukur dan syukur, puji dan puji, lagi dan lagi sampai tiada lagi

Periksa periksa periksa… berinut tah ko selama-lamanya…

Izinkan ku siasi turut nyampuk arah gembira kamu yang sudah selasai menjalani hukuman penjara. Banduan lapas pun inda iski cani nie, bukan plang pernah. Brabis tinggi lumpatnya hatiku bila kena suruh ngampai pen pastu kena suruh duduk diam nunggu kena ambil kratas dari tangan ku. Teranah ku duduk tekidum-kidum. Pemeriksa pun bangang, prasan kena urat, bepada-pada jua sudah senyuman ku atu. Adang pasal atu. Masa anie, dapat balik ku nyambung kraja-kraja yang nada masa kan di sibukkan di kala utak kumuh, misalnya mendangar betapa sayunya suara katak betarap dengan irama reggae di malam hari, membuatkan samut-samut atas tudung butul coke guyang kaki menari-nari. Atau dapat balik nyambung kraja ngira taie lalat di tubuh anie, pastu sambung-sambung titik-titik itam atu pakai pensil macam latihan buku di skulah randah. Usul-usulnya gambar kuda brasin plang nie.

Sem 3 anie, banyak ku baru belajar pasal sejarah negri tani hasil dari bahasa Melayu Nusantara atu, ke tempat-tempat besejarah kami contohnya the mall, ngurik rangka-rangka tulang manusia yang ngam makan baga masa ia kena tanam idup-idup, ada maseh plastik lambang penyangat, Jollibee tah kali tu. Tapi yang kan ku kungsi arah kamu, satu tabiat yang kena turun-turuni sejak dulu-dulu lagi. Bukan betabiat ah.

Dalam alam tani yang serba serbi, banyak misteri dunia yang akal cacat tani maseh alum tekupas, maseh lagi ada inda pemandainya cerdik-pandai tani, cuatah suruh cEinstein atu makan belacan, nada ya pandai tu. Satu masalah selasai, seribu masalah mengakai, jareh kepala jelama memisi sebiji-sebiji. lapas di buka satu pintu mau lagi membuka pintu lapas atu, sibuk banar jelama kan meliat urang mandi anie. tapi bejurit lagi maseh kejadian dunia yang alum lagi ada jawapan puas hati. Antara contoh mithali misteri menggaru ketiak anie macam brapa lama kan hayat seorang kartun? Sama macamana kan di bunuh derang anie? atau di mana slalu hang tuah minum teh tarik nya? Atau apa jenama kain hantu puchong? Indakan bepuluh-puluh cerita sudah masuk maseh alum kena sponsor.

Menyasar sikit semua karut, apa sebenarnya rahsia di calah ungkapan ‘inda kuasa’. Semua jelama brunei yang pernah bejumpa sorang nini pernah dangar ‘inda kuasa’ anie kurang labeh 37 kali dalam sehari. Frasa inda kuasa, sentuh ampir seluruh aspek idup sorang individu. Lain-lain keluarga, ada lain-lain versi inda kuasa derang. Apa sebenarnya salasilah inda kuasa anie? sapa sebenarnya menguat-kuasakan inda kuasa? Ada temaktub dalam akta kanun negara kah? Paksa rujuk loyar tani tu, nanti menanya abg presiden. Masa ku tanya satu prof yang pakar dalam bidang keninian anie, niniku plang tu, anie padahnya:

“inda kuasa betanya pasal inda kuasa anie lai”

Jan dulu dukacita pasal sukacita dimaklumkan, selapas kajian selautan, sama rundingan teliti dengan ‘orang dalam’ kedapatan tia ku…

Asal usul INDA KUASA.

Bejam-jam ku ngunjar di pustaka-pustaka sekitar tanah air, nda kedapatan. Kan tutup kes sudah, tapi kedapatan tia arah tampat paling aher sekali ku aga, pustaka paling unggul di brunei atu, inda ku ingat namanya, Pustaka Remaja kali. Arah bahagian tongkat-tongkat sama sirih pinang, ada memacul sikit, buku kena impit bawah rek, behabuk-habuk. Lapas sejam setangah dapan kipas meniup-niup habuk atu, Nampak tia tajuk buku atu. “kaling gey kaling gam” atau kurang labeh tafsirnya dalam bahasa kitani…

“KITAB INDA KUASA”

Kitab anie banyak guna bahasa-bahasa kulut, pusing-pusing, 2-3 perenggan, padahal isinya ‘aku kan ke jamban’ jua ganya. Kubagi sipnosis bahasanya, arah bahagian sekapur sirih buku anie.

“Arakian…

Bunga rampai bunga suasa bunga purana

Barserabut di dalam dada bebulu puteh tumbuh kepala

Tokoh-tokoh pria tunggang turbalik huru hara

Brunei akan maju selepas kiamat akan tiba”

Rasa-rasanya mental plang penulisnya atu tapi dalam kitab anie, ada penjelasan yang teliti pasal ‘inda kuasa’ anie, ujung rambut ke ujung kaki, inda membari-bari. Di bawah, ringkasan creta tersebut.

Daripada karya ke terjemahan minda kepada kata-kata membabi buta

…Al-kisah

Jaman dawulu, sebelum jelama india-cina-indo-pilipin menyampuk, sebelum lagi ada astro, facebook, sama transformers, sebelum-sebelum lagi islam datang ke tanah tani, brunei panuh dengan urang2 melayu saja atau masa atu kena panggil mo-lo-yue. Masa atu, jelama alum tinggal sebagai satu masyarakat yang utuh, nada undang-undang teguh, buleh pacut saja masa lampu merah, alum plang ada traffic light. Derang tinggal setabur sini setampias sana. Alum ada jemputan-jemputan kawin, inda payah takut inda ngaga urang manggil ijap derang inda ngaga tani balik.

Pada satu hari, ada kanak-kanak bemain guli siring pantai pakai buah piasau, derang nampak ada kapal laut basar yang menuju kan paking. Indung derang, bapa nelayan yang samseng, orang kuat masa atu. Mama suripunduk, pakak sebalah telinga sama buta setampik, tecangang pasal baru pernah nampak kapal.

Bapa arah mama “ling, sapa kah tu?”

Mama menjawap “ ah?? Kah-ling?? Apakan cakap mu anie?” sambil menunjuk2.

Kanak-kanak tadi beranti main guli, sorang atu namanya Arakian tedangar kurapak indungnya atu pastu dangki nunjuk kapal sambil luncat-luncat “kahling!!…kahling!!…kahling!!”

Lapas kapal atu selasai paking reverse, manusia dalam kapal turun. Jelama-jelama yang turun anie bekulit itam, botak-botak, mua katat-katat, kan pacah ganya inda. Tani lumpat bahagian protokol-protokol, derang jabat tangan kali apa, ada sorang, aher sekali ya turun, namanya Sulemat Upasarga, usulnya ketua tentera bekulit itam anie, bila kuku kaki nya yang panjang atu di lantik nya sikit, semua askarnya nyuruh keluarga mo-lo-yue anie tunduk. Si nelayan inda mau, lapas karas-mengarasi, si bapa kena pancung dapan mata keluarganya. Si Arakian tunduk takut tapi mata merah.

Kampong ke kampong derang jelajah, satu tanah mo-lo-yue kenal derang, malam-malam, orang bisik-bisik kurapak pasal derang. Inda batah atu, derang mula ampai undang-undang, yang bangsa mo-lo-yue anie paksa patuh. Sapa yang langgar kena pancung. Undang-undang anie kena bina atas dasar nafsu sulemat sendiri. Jadi banyak benda yang inda dapat buat atu inda berapa masuk akal. Apa yang ia suka, buat, apa yang inda, pancung. Dua hukum anie kena panggil:

Baroo (buleh buat)

Nay baroo (inda buleh atau inda kuasa)

Warga tuha masa atu nada masalah patuh hukum-hukum anie, tapi orang-orang muda selalu inda sengaja kan telanggar peraturan, jadi bila derang kan tebuat, orang tua inda suruh, takut derang gtau kalau buat kena pancung, kena gtau saja jantah di buat, inda kuasa.

Pemerintahan derang lama, sampai turun temurun undang-undangnya, inda payah bebuku, semua jelama apal sebiji-biji, A ke Z. Walaupun cematu, majoriti orang sembunyi banci, kan kelaie inda dapat dikalahi, pasal nada senjata-senjata sakti. Tapi satu hari, ada satu kapal datang lagi.

Semua askar sulemat kucar-kacir, sedia senjata. Orang yang baru datang atu heran pasal tarus-tarus kena serang. Walaupun tentera sulemat ramai, tapi sayur saja kena makan oleh pendatang baru anie. Sorang-sorang mati lagi dan lagi sampai tiada lagi.

Ketua tentera baru atu diri dapan khalayak yang meliat perang tadi. Ia isyarat supaya derang datang dekat. Ia mula buku mulut.

Ia luah satu ungkapan inda urang paham masa atu, lapas atu ia cakap…

“nama ku sharif…

… sharif a..”

tebangun tia ku