Theori Darwin

Sejak satu-dua belakang anie, post2 tani banyak berisi resipi2 yang serius. Semua atu nada plang masalah, ada kebaikan tersendiri, tapi… ada jua baiknya tani suluh dikit lampu arah benda2 mengklitik hati. Hidup anie bukan semua mengancangkan mua... macam tukang kabun niniku selalu bepadah “waduh mas, Loh kok serriuss banget, ngomongin dong sama gue, pecahkan aja gelas nya biar ramai” sekali ada tia jelama tarus2 masuk “awu banar tu wang eh, jan serious anie, pacah tia karang mua atu” Moralnya… jan nyampuk.

Tapi tuan-puan, hidup anie bukan jua semua memacahkan parut… atau istilah orang kitani – begila. Jelama kulit puteh pun ada bagitau “laughter is the best medicine”. Aku tah membagitau, kelakar basar tu. Kalau tah atu banar, kenapa tani nda ketawa bila ada musibah datang contohnya: jenazah-jenazahan, atau untuk orang muda: putus-putusan.. alum lagi ku teliat pembaca berita tebahak-bahak ketawa bagitau berita gempa-bumi, ada ya tarus minta sedakah sebalah BB atu. Yatah ingat ku nasehat dietician niniku, nya “subuk dulu wang aing atu, lapas atu tungap tia.”

Jadi… macamana topik di atas atu palak-palak, bisai jua kalau tani kurapak-kan sedikit pasal penduduk2 jelama brunei anie. Ada banyak debat-hebat dalam petangkaran sama ada theori Darwin anie lurus kah inda. Tudung telah di tarik.. songkok telah di pijak, tapi alum jua selasai. Di skulah kena ajar macam satu fakta, tapi namanya kakal jua maseh satu theori. Daun-nya, padah cDarwin atu, jelama anie asal nya dari ambuk atau apakah… yang pentingnya, ambuk anie udah lama2, sudah inda lagi mengunyah pisang kali, me-evolusi tia jadi insan. Evolusi anie lah kena tangkarkan. Untuk pembaca2 di sana atu, kediaku sebagai penulis article anie, peratus seratus setuju pendapat nya anie. HA!

Sebelum biskita mula menyabut nama2 neraka, relak.. santai dulu, aga didih aing, buat kupi, tutup mulut atu, lacah sudah keyboard ah. Evolusi yang ku sukung peratus-seratus anie bukan evolusi yang jadi atas jelama, tapi evolusi pada nama. Peranan nama anie bukan calang2. Setiap benda dalam dunia dunia anie ada nama, macamatu tah jua jelama. Jadi.. kalau kan di tuleh arah kreatif, penduduk jelama brunei paling unik kalau menamakan cahaya mata derang sampai belaku satu evolusi. Evolusi anie di karat lagi kepada 3 generasi. Generasi anie:

1. Zaman permulaan
2. Zaman gemilang
3. Zaman over

Zaman permulaan

Macamana setiap benda yang pas taim (1^st time) jelama buat, ada saja kurang nya. Bejalan kali pertama rabah, menulis kali pertama banyak masalah, sekolah hari pertama muleh rumah baju kamah, pastu kena marah. Akar-nya, jelama bukan di cipta dalam keadaan sempurna, tapi tani belajar dari pengalaman lama. Macatu jua arah nama. Dalam zaman permulaan nama… nama2 penduduk baru bumi brunei anie santai saja nama derang. Jadi nama2 derang anie temasuk perkataan2 macam damit, basar, hidup, sulung….. kiut, kasum, kudil. Rantai-nya, macam postman nini ku selalu bepadah “what you see is what u get”. Ada lagi sampai nama2 hari. Ikut hari derang lahir kali. Tudung-nya, bila si-damit sudah basar sama sama si-kiut sudah biut, menulis borang kakal jua maseh nama atu damit kiut. Anie-lah phasa pertama.

Zaman gemilang

Lapas itu, jelama brunei baru perasan ke-unikan nama derang. Silap sudah tahu, kebetulan mesti belaku. Yang miatu biartia miatu. Sekali… sudah makin panuh jelama brunei anie dapat degree agama, nama2 insan tani pun mula banyak lawa. Nama derang anie temasuk nama2 anbia (nabi-nabi). Nama2 sahabat macam Abu bakar, Omar, Othman, Ali. Nama2 kreatif jua ada, nama2 yang ada khairul awal nya tu.. yatah tu. Nama2 Allah pun luas orang makai. Anie lah tani panggil zaman emas, zaman yang dalam-nya brunei manang liga-M, Sukan-sea, zaman tani mula pandai art atil-mengatil.

Zaman over

Satu lagi sifat yang kena cipta dalam naluri, sifat bureng. Sifat anie banyak ada arah hidup harian tani. Pernah kamu cakap arah bf/gf kamu “bureng ku ko anie eh, putus tani”… ahh, ngam tah sudah tu. Sudah penggunaan nama ‘zaman gemilang’ luas.. telampau luas kali, mula tia jua jelama tani cari plan-B. manusia mula mau yang lain dari lain, catu tah jua arah nama. Tapi apa jadi bila semua orang mau lain dari lain, balik tia jua semula semua orang sama. Contoh nama2 dalam zaman anie istilah-nya 'nama2 karangan' macam:

Siti nur amalina batrisya jumratul aqaba hur ul-ain binte awang mail (contoh specimen saja)

Nama2 yang sampai abis sudah masa periksa tapi alum lagi selasai menulis nama (sorry ah mr presiden, nama biskita atu maseh dalam nama zaman gemilang tu). Nama2 yang buat orang arab pun cakap “ishh haza?” akan datang satu masa kali bila nama2 anie kena rojak macam:

Omar bruce lee peters bin steven abul aswad stefonopolis

Bungkus-nya, anie lah tampat tani, jelama2 yg ada degree agama anie masuk main peranan, tani lah tukang catur masa depan nama2 anak2 brunei nanti, ganggam tia balik joystick atu, pasal nanti mama/bapa yang-akan-datang, akan datang arah tani untuk minta nama lawa.

Ahir sekali, ‘zaman over’ anie bukan satu kan dimalukan-bukan jua satu kebanggaan, boleh jadi benda baik-boleh jua jadi satu epidemik.

Macam bespren nini ku selalu bepadah “theres always two sides to an argument”. (jantah heran napa English, ia kacukan…… kacukan tutong sama belait,LoL)

Sama.. macam cendikiawan tani slalu bagitau “bah.. apalagi! Krajakan tia kutak komen ah”